Gazagystanda birinji derejeli lukmanlaryň aýlygy 760 müň tenge çenli ýokarlanar

Gazagystanda takmynan 77 müň birinji derejeli saglyk hyzmatkärine üznüksiz iş stažy üçin goşmaça tölegiň berilmegi meýilleşdirilýär. Bu barada Döwlet Baştutany Kasym-Žomart Tokaýew Gazagystan halkyna Ýüzlenmesinde habar berdi. Maglumat Saglygy goraýyş ministrliginiň metbugat gullugyna salgylanyp, Tengri Health tarapyndan ýaýradyldy.

Ministrligiň teklibine görä, goşmaça tölegiň möçberi staža baglylykda kesgitlenjek: iki ýyldan köp staži bolanlara resmi aýlygyň 20 göterimi, üç ýyldan köp staži bolanlara 30 göterimi, bäş ýyldan köp staži bolanlara 50 göterimi tölenmeli. Ahyrky möçber resmi aýlyga we iş ýerine bagly bolar. Ministrligiň maglumatlaryna görä, obalarda iň uzyn staže eýe umumy tejribeli lukmanlaryň aýlygy 534 müň tengeden 760 müň tenge çenli, orta derejeli lukmanlyk işgärleriniň aýlygy bolsa 284 müň tengeden 401 müň tenge çenli ýokarlanyp biler.

Şäherlerde iň uzyn staže eýe umumy tejribeli lukmanlaryň aýlygynyň 425 müň tengeden 607 müň tenge çenli ýokarlanmagy göz öňünde tutulýar. Prezidentiň tabşyrygyna laýyklykda, hökümet birinji derejeli işgärleriň aýlyklaryny indiki ýylyň 1-nji ýanwaryndan artyrmaly.