Qozogʻistonda birlamchi tibbiyot xodimlarining maoshi 760 ming tengegacha oshadi

Qozogʻistonda taxminan 77 ming birlamchi tibbiyot xodimi uzluksiz ish staji uchun qoʻshimcha toʻlov olishi rejalashtirilmoqda. Bu haqda Davlat rahbari Qosim-Jomart Toqayev Qozogʻiston xalqiga Murojaatnomasida aytdi. Maʼlumot Sogʻliqni saqlash vazirligi matbuot xizmatiga tayanib Tengri Health tomonidan yetkazildi.

Vazirlik taklifiga koʻra, qoʻshimcha toʻlov miqdori staj davriga qarab belgilanadi: ikki yildan ortiq staj uchun rasmiy maoshning 20 foizi, uch yildan ortiq uchun 30 foizi, besh yildan ortiq uchun 50 foizi. Yakuniy summa rasmiy maosh va ish joyiga bogʻliq boʻladi. Vazirlik maʼlumotlariga koʻra, qishloq joylarda eng uzoq stajga ega umumiy amaliyot shifokorlarining maoshi 534 ming tengedan 760 ming tengega, oʻrta tibbiyot xodimlarining maoshi esa 284 ming tengedan 401 ming tengega oshishi mumkin.

Shaharlarda eng uzun stajga ega umumiy amaliyot shifokorining maoshi 425 ming tengedan 607 ming tengegacha koʻtarilishi rejalashtirilgan. Prezident topshirigʻiga koʻra, hukumat birlamchi tibbiyot xodimlarining maoshini kelgusi yilning 1 yanvaridan oshirishi kerak.