Türkmenistanda gaýtadan dikeldilýän energiýa boýunça okuw maslahaty geçirildi

28-nji oktýabrda Türkmenistanyň Döwlet energetika institutynda Germaniýanyň hünärmenleriniň gatnaşmagynda «Gaýtadan dikeldilýän energiýa çeşmeleri we energiýa saklaýyş ulgamlary» atly okuw maslahaty geçirildi. Çäre Germaniýanyň Halkara hyzmatdaşlyk boýunça jemgyýetiniň (GIZ) «Merkezi Aziýada gaýtadan dikeldilýän energiýa» (RECA) taslamasynyň çäklerinde guraldy.

Okuw maslahatynyň esasy maksady Türkmenistanyň Döwlet energetika instituty bilen german hyzmatdaşlarynyň arasynda energetika pudagynda tejribe alyşmagy ösdürmek, şeýle hem ýokary okuw mekdebiniň hünärmenleriniň gaýtadan dikeldilýän energiýa çeşmeleri babatdaky bilim derejesini we hünär başarnyklaryny ýokarlandyrmak boldy.

Çäräniň dowamynda RECA taslamasynyň esasy wezipelerine we institutyň gaýtadan dikeldilýän energiýa çeşmeleri we energiýany saklaýyş ulgamlary babatdaky mümkinçiliklerini ösdürmegiň ugurlaryna bagyşlanan çykyşlar diňlenildi. Ýewropanyň Gaýtadan dikeldilýän energiýa akademiýasynyň (RENAC) wekilleri we GIZ-iň hünärmenleri giňişleýin çykyş etdiler. Maslahatda fotoelektrik gün stansiýalarynyň tehnologiýalary, energiýany saklaýyş ulgamlary, energetika ulgamynyň çeýeligi we durnuklylygy hem ara alnyp maslahatlaşyldy. Taraplar geljekki hyzmatdaşlygy ösdürmegiň meýilnamalary barada pikir alşdylar.