Turkmanistonda qayta tiklanuvchi energiya sohasida oʻquv seminari oʻtkazildi

28-oktabr kuni Turkmaniston Davlat energetika institutida Germaniya mutaxassislari ishtirokida «Qayta tiklanuvchi energiya manbalari va energiyani saqlash tizimlari» mavzusida oʻquv seminari boʻlib oʻtdi. Tadbir Germaniyaning Xalqaro hamkorlik jamiyati (GIZ) «Markaziy Osiyoda qayta tiklanuvchi energiya» (RECA) loyihasi doirasida tashkil etildi.

Seminarning asosiy maqsadi Turkmaniston Davlat energetika instituti va nemis hamkorlari oʻrtasida energetika sohasida tajriba almashishni rivojlantirish, shuningdek, oliy taʼlim muassasasi mutaxassislarining qayta tiklanuvchi energiya manbalari boʻyicha bilim darajasi va kasbiy koʻnikmalarini oshirish edi.

Tadbir davomida RECA loyihasining asosiy vazifalari hamda institutning qayta tiklanuvchi energiya manbalari va energiyani saqlash tizimlari boʻyicha imkoniyatlarini rivojlantirishga bagʻishlangan maʼruzalar tinglandi. Yevropa qayta tiklanuvchi energiya akademiyasi (RENAC) vakillari va GIZ mutaxassislari ham chiqish qilishdi. Seminar doirasida fotoelektrik quyosh stansiyalari, energiyani saqlash tizimlari, energetika tizimining moslashuvchanligi va barqarorligi masalalari muhokama qilindi. Tomonlar kelgusida hamkorlikni rivojlantirish rejalari yuzasidan ham fikr almashdi.