Türkmənistanda bərpa olunan enerji sahəsində təlim seminarı keçirilib

Oktyabrın 28-də Türkmənistan Dövlət Energetika İnstitutunda Almaniya mütəxəssislərinin iştirakı ilə «Bərpa olunan enerji mənbələri və enerji saxlama sistemləri» mövzusunda təlim seminarı keçirilib. Tədbir Almaniyanın Beynəlxalq Əməkdaşlıq Cəmiyyətinin (GIZ) «Mərkəzi Asiyada bərpa olunan enerji» (RECA) layihəsi çərçivəsində təşkil edilib.

Təlim seminarının əsas məqsədi Türkmənistan Dövlət Energetika İnstitutu ilə alman tərəfdaşları arasında enerji sahəsində təcrübə mübadiləsini inkişaf etdirmək və ali məktəb mütəxəssislərinin bərpa olunan enerji mənbələri üzrə bilik səviyyəsini və peşəkar bacarıqlarını artırmaq olub.

Tədbirdə RECA layihəsinin əsas vəzifələri və institutun bərpa olunan enerji mənbələri və enerji saxlama sistemləri üzrə imkanlarının inkişafı istiqamətlərinə həsr olunmuş çıxışlar dinlənilib. Avropa Bərpa Olunan Enerji Akademiyasının (RENAC) nümayəndələri və GIZ-in mütəxəssisləri də geniş məruzələrlə çıxış ediblər. Seminarda fotovoltaik günəş elektrik stansiyaları, enerji saxlama sistemləri, enerji sisteminin çevikliyi və davamlılığı müzakirə olunub. Tərəflər gələcək əməkdaşlığın inkişafına dair planları da müzakirə ediblər.