Almatida 48 oʻquvchi kasalxonaga yotqizilgach, jinoyat ishi qoʻzgʻatildi

Qozogʻistonning Almati shahrida politsiya Respublika fizika-matematika maktabining 48 nafar oʻquvchisi kasalxonaga yotqizilgan voqeadan soʻng jinoyat ishi qoʻzgʻatdi. Xabar NUR.KZ nashridan olindi.

Almati politsiya departamenti Instagram sahifasida ishni Bostandiq tumani politsiya boʻlimi qoʻzgʻatganini maʼlum qildi. Politsiya, SES tekshiruv xulosasi ham kiradigan bir qator tergov tadbirlari asosida voqea holatlari aniqlanishi va protsessual qaror qabul qilinishini qoʻshimcha qildi.

Ilgari maktabdagi oʻnlab oʻquvchilar oʻtkir ichak infeksiyasi belgilari bilan kasalxonaga tushgani xabar qilingan va maktabda tekshiruvlar boshlangan edi. Almati jamoat salomatligi boshqarmasi soʻnggi maʼlumotga koʻra 48 oʻquvchi kasalxonaga yotqizilganini, yana 6 bola esa internatda ajratilib, tibbiy kuzatuv ostida ekanini aytdi. Sogʻliqni saqlash vazirligi maktabda aniqlangan buzilishlar va koʻrilayotgan choralar haqida gapirdi. Maktab oʻquvchilarni vaqtincha masofaviy taʼlim formatiga oʻtkazganini bildirdi.