Tatarstan mehnat vaziri Hindistondan kadrlar jalb qilish haqida gapirdi

Tatarstonning mehnat, bandlik va ijtimoiy himoya vaziri Elmira Zaripova Hindiston yosh ishchi kuchining yirik manbalaridan biri ekanini aytdi. Uning soʻzlariga koʻra, har yili mehnat bozoriga 7–8 million kishi chiqadi, chet elda esa taxminan 15 million hindistonlik fuqaro ishlaydi. U bu fikrlarni Qozonda boʻlib oʻtgan II Rossiya-Hindiston “TIME” biznes forumining sessiyasida bildirdi.

Zaripovaning aytishicha, Hindiston ingliz tilida gaplashadigan muhandis va IT mutaxassislari, tibbiyot xodimlari hamda yuqori malakali payvandchilar yetkazib beradi. Tatarstonning oliy oʻquv yurtlarida 1300 dan ortiq hindistonlik talaba tahsil oladi, bu raqam besh yil ichida deyarli ikki barobarga oshgan. Toʻrt yetakchi universitet Hindiston universitetlari bilan kelishuvlarga ega.

Ishga jalb qilish Rossiya hukumati belgilagan kvotalar doirasida amalga oshiriladi. Respublikada bu yil uchun 3 mingdan ortiq kvota ajratilgan, 1051 ta ishlash ruxsatnomasi rasmiylashtirilgan. Zaripova rasmiy shartnoma, bozor narxidan past boʻlmagan ish haqi, mehnat muhofazasi va ishlash ruxsatnomasi kabi talablarni sanab oʻtdi.