Oʻzbekistonning tashqi qarzi bir yilda 24,7 foizga oshib, 88,03 mlrd dollarga yetdi

Jahon banki “International Debt Report 2026” hisobotiga koʻra, Oʻzbekistonning tashqi qarzi 2025-yil oxiriga kelib 88,03 mlrd dollarga yetgan va bir yil ichida 24,7 foizga oshgan. Soʻnggi oʻn yilda qarz taxminan 6,5 barobar koʻpaydi: 2015-yilda u 13,57 mlrd dollar edi. Oʻsish surʼati Yevropa va Markaziy Osiyodagi 15,3 foizlik hamda kam va oʻrta daromadli davlatlardagi 5,5 foizlik oʻsishdan yuqori boʻldi.

Umumiy qarzning 48,46 mlrd dollari davlat va davlat kafolatidagi majburiyatlardan iborat. Shundan 22,82 mlrd dollari xalqaro moliya tashkilotlariga, 10,53 mlrd dollari esa xorijiy davlatlarga toʻgʻri keladi. Xitoyga 3,85 mlrd, Yaponiyaga 2,99 mlrd dollar qarz bor. Xususiy kompaniyalarning tashqi qarzi 32,84 mlrd dollarni tashkil etadi.

2025-yilda Oʻzbekiston xalqaro obligatsiyalar bozorida 3,9 mlrd dollarlik obligatsiya joylashtirdi. Tashqi qarz yalpi milliy daromadning 60 foiziga va eksport tushumlarining 227 foiziga yetdi. Shunga qaramay, qarz xizmati xarajatlari eksport tushumlarining 29 foiziga tushdi va 2024-yilga nisbatan 18,6 foizga kamaydi; yalpi milliy daromadga nisbati 8 foiz boʻlib, 17,7 foizga kamaydi.