Aliyev: olti yilda Qarabogʻ va Sharqiy Zangezurga qariyb 100 ming kishi qaytarildi

Ozarbayjon Prezidenti Ilhom Aliyev va birinchi xonim Mehriban Aliyeva 6-noyabrda Zangilon tumanidagi Jahongirbayli qishlogʻining birinchi bosqichi ochilishida ishtirok etdi. Qishloq 1993-yilda Armaniston qurolli kuchlari tomonidan bosib olingan edi. Ozarbayjon Qurolli Kuchlari qishloqni 2020-yil 21-oktabrda ozod qildi. Qishloq poydevori Prezident Ilhom Aliyev tomonidan 2023-yil mayida qoʻyilgan.

Modern.az xabariga koʻra, umumiy maydoni 179,5 gektar boʻlgan qishloqning birinchi bosqichida 62,57 gektar hududda 242 ta yakka uy, maktab binosi, bolalar bogʻchasi, maʼmuriy bino, bozor majmuasi va koʻp funksiyali bino qurilgan. Uylar suv, elektr, gaz, quyosh panellari va yuqori tezlikdagi internet bilan taʼminlangan. Koʻp funksiyali binoda shifokor punkti, dorixona, doʻkon, tikuvchi va goʻzallik saloni faoliyat yuritadi. Maktabda 264 oʻquvchi oʻqishi mumkin.

Prezident Ilhom Aliyev va birinchi xonim Jahongirbayli va Soltanli qishloqlariga koʻchib kelgan aholi bilan uchrashdi. Prezident ushbu ikki qishloqqa taxminan 700 ga yaqin oila qaytayotganini aytdi. Shuningdek, u soʻnggi olti yil ichida 100 mingga yaqin kishi Qarabogʻ va Sharqiy Zangezurga qaytarilganini bildirdi.