Altı ildə 100 minə yaxın insanı Qarabağa və Şərqi Zəngəzura qaytarmışıq - Prezident

Azərbaycan Respublikasının Prezidenti İlham Əliyev və birinci xanım Mehriban Əliyeva noyabrın 6-da Zəngilan rayonunun Cahangirbəyli kəndinin birinci mərhələsinin açılışında iştirak edib. Kənd 1993-cü ildə Ermənistan silahlı qüvvələri tərəfindən işğal olunmuşdu. Azərbaycan Silahlı Qüvvələri kəndi 2020-ci il oktyabrın 21-də işğaldan azad edib. Cahangirbəyli kəndinin təməli Prezident İlham Əliyev tərəfindən 2023-cü ilin mayında qoyulub.

Modern.az-ın xəbərinə görə, ümumi sahəsi 179,5 hektar olan kəndin birinci mərhələsində 62,57 hektar ərazidə 242 fərdi ev, məktəb binası, körpələr evi-uşaq bağçası, inzibati bina, bazar kompleksi və çoxfunksiyalı bina tikilib. Evlər su, işıq, qaz, Günəş panelləri və yüksəksürətli internetlə təmin olunub. Çoxfunksiyalı binada həkim-tibb məntəqəsi, aptek, market, dərzi və gözəllik salonu fəaliyyət göstərəcək. Məktəb 264 şagird yerlikdir.

Prezident İlham Əliyev və birinci xanım Cahangirbəyli və Soltanlı kəndlərinə köçən sakinlərlə görüşüb. Prezident bildirib ki, bu iki kəndə təqribən 700-ə yaxın ailə qayıdır. Prezident həmçinin deyib ki, Azərbaycan Respublikası altı il ərzində 100 minə yaxın insanı Qarabağa və Şərqi Zəngəzura qaytarıb.