Qirgʻizistonda 2026-yilning 9 oyida YaIM 10,8 foizga oshdi

Qirgʻiziston Bosh vaziri Adilbek Kasimaliyev Prezident Sadir Japarov rahbarligida oʻtgan Vazirlar Mahkamasining navbatdagi majlisida mamlakat iqtisodiyotining yuqori oʻsish surʼatlarini saqlab qolayotgani va xalqaro obroʻsini mustahkamlayotganini aytdi. Uning soʻzlariga koʻra, yalpi ichki mahsulot 2025-yilda 11,1 foizga, 2026-yilning birinchi toʻqqiz oyida 10,8 foizga oshgan.

Rasmiy statistikaga koʻra, 2025-yilda Qirgʻizistonga toʻgʻridan-toʻgʻri chet el investitsiyalari 1 milliard 310,8 million dollar miqdorida jalb qilingan, 2026-yilning birinchi yarim yilligida bu koʻrsatkich 709,9 million dollarni tashkil etgan. Kasimaliyev davlat manfaatlarini himoya qilish va loyihalarning iqtisodiy samaradorligini taʼminlash davlat vazifasi ekanini taʼkidladi.

Vazirlar Mahkamasi milliy investitsiya va davlat ahamiyatidagi loyihalarni tanlash tartibi toʻgʻrisidagi nizomga hamda Bishkek, Karakol, Leylek, Maymak va Norin erkin iqtisodiy zonalari toʻgʻrisidagi qarorga oʻzgartirish kiritdi. Norin viloyatida energiya koʻp talab qiladigan, past uglerodli ishlab chiqarish uchun sanoat parkini qurish va ishlatish boʻyicha investitsiya loyihasi ham maʼqullandi. Kasimaliyev qarorlar investorlar uchun tushunarli, hisob-kitob, hisobot va nazorat tartibi aniq boʻlishi kerakligini taʼkidladi.