Oʻzbekistonda 2030-yilgacha ishsizlik darajasini 4 foizga tushirish rejalashtirilmoqda

Oʻzbekistonda 2030-yilgacha ishsizlik darajasini 4 foizga tushirish rejalashtirilmoqda. Bu haqda Kambagʻallikni qisqartirish va bandlik vazirligi ishlab chiqqan hujjat loyihasida yozilgan boʻlib, u normativ-huquqiy hujjatlar loyihalari muhokamasi portaliga joylashtirilgan.

Hujjatga koʻra, 2030-yilgacha norasmiy sektorda ishlayotgan aholining umumiy bandlikdagi ulushini 25 foizgacha kamaytirish, xotin-qizlar oʻrtasidagi ishsizlikni 5 foizgacha, yoshlar oʻrtasidagi ishsizlikni esa 4,5 foizgacha tushirish maqsad qilingan. Boshqaruv lavozimlaridagi xotin-qizlar ulushini 35 foizga yetkazish ham rejalashtirilmoqda.

Strategiyada 700 ming nafar ishsiz va rasmiy daromadga ega boʻlmagan ish qidiruvchini vaucher asosida oʻqitish nazarda tutilgan. 2030-yilgacha 50 ming yangi “yashil” ish oʻrni yaratish va bandlik xizmatlarining 70 foizini raqamlashtirish koʻzda tutilgan. 2025-yilda mamlakatda 745 ming nafar ishsiz boʻlib, ishsizlik darajasi 4,8 foizni tashkil etgan.