Qirgʻiztest rahbari: Japarovga davlat tili testini topshirish shart emas

“Qirgʻiztest” davlat muassasasi rahbari Batma Topoyeva-Stavinskaya jurnalistlarga bildirdi: agar prezident Sadir Japarov 2027-yil 27-yanvarga belgilangan davlat rahbari saylovida nomzodini qoʻyadigan boʻlsa, u qirgʻiz tilini bilishini qayta tasdiqlashi shart emas.

Uning aytishicha, 2020-yilda nomzod sifatida Japarov davlat tilidan B2 darajasida sertifikat olgan. “Prezidentning natijalari juda yaxshi edi, chunki u tilni haqiqatan ham juda yaxshi biladi, talab qilinganidan yuqori darajada. Uning bilimini yana bir bor tasdiqlashga ehtiyoj yoʻq”, – dedi Topoyeva-Stavinskaya. U sertifikatlar muddatsiz ekanini ham qoʻshimcha qildi.

“Qirgʻiziston Respublikasi saylovlari toʻgʻrisida” konstitutsiyaviy qonunga koʻra, davlat rahbari nomzodi davlat tilini barcha muloqot sohalarida kasbiy faoliyat uchun “oʻrtadan yuqori” darajada bilishi kerak. Bu daraja Vazirlar Mahkamasi tomonidan tasdiqlangan talablar asosida belgilanadi va belgilangan namunadagi sertifikat bilan tasdiqlanadi.