Kosmos, minerallar va «Artemida» kelishuvi: Rubio Samarqandda nimalar haqida kelishdi

AQSh va Oʻzbekiston infratuzilma loyihalari, muhim minerallarni qidirish, «C5+1» formatida muvofiqlashtirish hamda aerokosmik sohadagi keng qamrovli hamkorlikni oʻz ichiga olgan strategik sheriklikni chuqurlashtirishga kelishib oldi. Bu haqda AQSh davlat kotibi Marko Rubio Samarqandda Oʻzbekiston tashqi ishlar vaziri Baxtiyor Saidov bilan uchrashuvdan soʻng X ijtimoiy tarmogʻidagi rasmiy sahifasida maʼlum qildi.

Muzokaralarning asosiy natijasi Oʻzbekistonning Oy, Mars, kometalar va asteroidlarni tinch maqsadlarda oʻrganish tamoyillarini belgilovchi «Artemida» kelishuvlariga (Artemis Accords) qoʻshilishi boʻldi. Tashqi ishlar vazirlari imzolagan hujjatga koʻra, Oʻzbekiston 2020 yilda AQSh Davlat departamenti va NASA homiyligida boshlangan global kosmik tashabbusning 77-ishtirokchi davlatiga aylandi.

Saidovning baholashicha, bu kelishuv Toshkentga NASA bilan toʻgʻridan-toʻgʻri hamkorlik, kosmik texnologiyalar almashinuvi va milliy kadrlar tayyorlash uchun keng imkoniyatlar ochadi. Rubio Samarqandning tarixiy yodgorliklari bilan tanishdi, tomonlar esa mintaqada barqarorlik va iqtisodiy farovonlikni mustahkamlashga intilishlarini tasdiqladi.