Raev: Sunʼiy intellekt turkiy xalqlarning tarixiy xotirasini almashtirmasligi kerak

Bishkek, 2026-yil 16-oktyabr. Turkiy madaniyat boʻyicha xalqaro tashkilot (TURKSOY) Bosh kotibi Sulton Raev sunʼiy intellektni rivojlantirish turkiy xalqlarning tili, madaniyati, anʼanalari va tarixiy xotirasini saqlash bilan birga olib borilishi kerakligini aytdi. U bu fikrlarni Bishkekda Turkiy davlatlar parlament assambleyasining (TURKPA) 15-yalpi majlisida bildirdi.

Raevning soʻzlariga koʻra, sunʼiy intellekt va texnologik taraqqiyot insoniyat kelajagi uchun ham umid, ham jiddiy xavotir uygʻotmoqda. U soxta xabarlar jiddiy tahdidga aylanganini va sunʼiy intellekt axborot haqqoniyligini tekshirishni qiyinlashtirishi mumkinligini taʼkidladi. Axborot makoniga masʼuliyatli yondashuv va yolgʻon maʼlumotlar tarqalishiga qarshi samarali yoʻllar topish zarurligini qayd etdi.

Raev parlamentlar texnologik rivojlanish uchun huquqiy asoslar yaratishi bilan birga demokratik qadriyatlar, soʻz erkinligi va xalqlarning maʼnaviy merosini himoya qilishi kerakligini bildirdi. U TURKSOY ning turkiy xalqlarning tillari va anʼanalari jumladan umumiy madaniy merosni saqlashdagi alohida rolini taʼkidladi.