Tokayev yiliga 300 ming tonna mis ishlab chiqaradigan zavod qurilishini boshladi

Qozogʻiston Prezidenti Qosim-Jomart Toqayev videoaloqa orqali Abay viloyatidagi Oqtoʻgʻay posyolkasida Oqtoʻgʻay mis eritish zavodi qurilishini boshlab berdi. Marosim ishtirokchilariga murojaat qilgan Prezident metallurgiya korxonasi qurilishini eng muhim loyihalardan biri deb atadi. U loyihani kon-metallurgiya tarmogʻidagi faol ishlarning natijasi deb baholadi va oʻtgan yilgi Xalqqa Murojaatida ushbu tarmoqning Qozogʻiston uchun strategik ahamiyatini taʼkidlaganini eslatdi.

Zavodning quvvati yiliga 300 ming tonna katod misi boʻlib, bu ichki bozor ehtiyojini toʻliq qondiradi. Toqayev Qozogʻiston yuqori sifatli rafinirlangan mis ishlab chiqaruvchilari orasida jahonning eng yirik oʻnligiga kirishini, shuningdek zavodda oltin va sulfat kislota ishlab chiqarilishini aytdi. Mamlakatda 9,5 mingdan ortiq konlar bor; yiliga qariyb 160 million tonna ruda qazib olinadi va 3,5 million tonna mis konsentrati ishlab chiqariladi. Oʻtgan yili qayta ishlash sanoati mahsuloti 60 milliard dollarga yetdi; soʻnggi uch yilda barcha viloyatlarda 540 ta sanoat loyihasi amalga oshirildi va qariyb 50 ming doimiy ish oʻrni yaratildi.

Prezident aksiyadorlarga ishchilarning barcha qonuniy ijtimoiy ehtiyojlarini qondirishni topshirdi va sanoatda raqamli texnologiyalar hamda sunʼiy intellektni keng joriy etishga chaqirdi. Qurilish ishlarining yuqori sifati va belgilangan muddatlarga rioya qilish ustuvor vazifa ekani taʼkidlandi. Qozogʻistonlik mutaxassislar va xitoylik hamkorlarga minnatdorchilik bildirildi.