Aliyev Qarabogʻni tiklashga 25,5 milliard manat ajratilganini aytdi

Prezident Ilhom Aliyev Qarabogʻni tiklash, qayta qurish va rivojlantirish boʻyicha VI Ozarbayjon xalqaro koʻrgazmasi Rebuild Garabagh ishtirokchilariga murojaat qildi. Murojaat davlat rahbarining rasmiy veb-saytida eʼlon qilindi.

Aliyev davlat byudjetidan tiklash va qayta qurish uchun 25,5 milliard manat ajratilganini taʼkidladi. Uning soʻzlariga koʻra, 300 ming gektardan ortiq hudud minalar va portlamagan oʻq-dorilardan tozalangan, 47 ta aholi punktiga 40 mingdan ortiq kishi qaytgan hamda ozod etilgan hududlarda taxminan 100 ming kishi yashaydi. Taxminan 1500 kilometr yoʻl qurilgan, uzunligi 11,7 kilometr boʻlgan Murovdag tuneli ishga tushirilgan, Fuzuli, Zangilan va Lachin xalqaro aeroportlari foydalanishga topshirilgan. Xoradiz–Agʻbend temir yoʻli Zangezur koridorining muhim qismi sifatida qurilmoqda.

Aliyev Buyuk qaytish davlat dasturining ikkinchi bosqichida asosiy maqsad xususiy investitsiyalarni oshirish, doimiy bandlikni kengaytirish va eksportga yoʻnaltirilgan ishlab chiqarishni rivojlantirish ekanini aytdi. Shuningdek, 2026 yilda Bakuda oʻtkaziladigan Jahon shaharlar forumi (WUF13) mamlakatning shaharsozlik sohasidagi yutuqlarini xalqaro miqyosda namoyish etishga xizmat qilishi qayd etildi.