Ozarbayjon 31 nafar turkiyalik fuqaroni persona non grata deb eʼlon qildi

Ozarbayjon Tashqi ishlar vazirligi bayonot chiqarib, mamlakat qonunchiligiga muvofiq 31 nafar Turkiya fuqarosi "persona non grata" deb eʼlon qilinganini va ularning mamlakatga kirishi taqiqlanganini maʼlum qildi.

Vazirlikning maʼlumotiga koʻra, qaror turli ijtimoiy tarmoqlar va internet platformalarida tarqatilgan bayonotlar sababli qabul qilingan. Bu bayonotlar Ozarbayjonning suverenitetiga, milliy xavfsizligiga, konstitutsiyaviy tuzumiga, xalqi va rahbariyatiga qarshi qaratilgan, hukumatni zoʻrlik bilan agʻdarishga chaqirgan yoki diniy ekstremizm asosida zoʻravonlikka undagan, shuningdek, diniy nafrat va adovatni targʻib qilgan deb koʻrsatilgan.

Roʻyxatda jurnalistlar, blogerlar, siyosatchilar va tadqiqotchilar bor. Ular orasida Yangi Farovonlik partiyasi raisi Fatih Erbakan, HÜDA PAR partiyasi rais oʻrinbosari Yahya Uğraş va deputat Ömer Faruk Gergerlioğlu ham bor. Vazirlik Ozarbayjonga qarshi dushmanlikni targʻib qiluvchi chaqiriqlar va faoliyatga nisbatan tegishli choralar koʻrilishda davom etishini bildirdi.