Yarim choralar kutilgan natijani bermaydi – Prezident harbiy islohot haqida

Qozogʻiston Prezidenti Qosim-Jomart Tokayev harbiy islohotni koʻrib chiqish maqsadida Qozogʻiston Respublikasi Xavfsizlik kengashi yigʻilishiga raislik qildi. Qazinform axborot agentligining Akorda matbuot xizmatiga tayanib bergan xabariga koʻra, yigʻilishning asosiy kun tartibi harbiy islohot rejasi loyihasi boʻldi.

Davlat rahbari mansabdor shaxslarga mamlakatda davom etayotgan umummilliy islohotlarni hisobga olgan holda mudofaa islohoti boʻyicha takliflarni tayyorlab, Xavfsizlik kengashiga taqdim etishni topshirdi. Tokayev qisqa muddatda zamonaviy, harakatchan va texnologik jihatdan rivojlangan armiya yaratishning muhim ahamiyatga ega ekanini taʼkidladi.

Tokayev shunday dedi: “Qurolli kuchlar sifatini oʻzgartirish vazifasi qoʻyildi. Bu qoʻmondonlik va boshqaruv, qoʻshinlar tayyorgarligi, kadrlar siyosati, harbiy taʼlim, mudofaani rejalashtirish va texnologik modernizatsiyaga taalluqli. Yarim choralar zarur natijani bermaydi.” Bundan oldin Tokayev mudofaa vazirligining yuqori lavozimli mansabdorlari bilan uchrashib, uzoq muddatli konsepsiyalar oʻrniga aniq, konkret va bosqichma-bosqich islohot rejasi tayyorlash zarurligini taʼkidlagan edi. Reja oktyabr oyining ikkinchi yarmida Xavfsizlik kengashi yigʻilishida koʻrib chiqiladi.