Ozarbayjon-Qirgʻiziston taraqqiyot jamgʻarmasi kapitali 200 mln dollarga oshirildi

Ozarbayjon Prezidenti Ilhom Aliyev Ozarbayjon-Qirgʻiziston taraqqiyot jamgʻarmasi ustav kapitalini 100 mln dollardan 200 mln dollarga oshirish hamda ikki davlat oʻrtasidagi ittifoqchilik munosabatlari toʻgʻrisidagi shartnomani tasdiqladi. Aliyev tegishli qonunlarni 2026-yil 13-oktabrda imzoladi, hujjatlar 21-oktabrda rasmiy prezident saytida eʼlon qilindi.

Bu qadam Bishkek va Bakuning 2026-yil 31-iyulda Cholpon-Otada erishgan kelishuvlarini yuridik tasdiqlash jarayonidagi navbatdagi bosqich boʻldi. Jamgʻarma 2022-yilda 25 mln dollar dastlabki kapital bilan tashkil etilgan. Jamgʻarma maʼlumotiga koʻra, 2026-yil II choragi oxiriga uning haqiqatda toʻlangan kapitali 63,82 mln dollarni tashkil etgan, jamgʻarma umumiy qiymati 76,67 mln dollar boʻlgan 11 ta investitsiya loyihasini maʼqullagan.

21 moddadan iborat shartnoma tashqi siyosat, xavfsizlik, harbiy va harbiy-texnik hamkorlik, energetika, savdo, investitsiya, raqamli texnologiyalar, fan, taʼlim va madaniyat sohalarini qamrab oladi. Shartnomani 2026-yil 31-iyulda prezidentlar Sadir Japarov va Ilhom Aliyev imzolagan. Qirgʻiziston Vazirlar Mahkamasi kapitalni oshirish boʻyicha kelishuvni 4-sentabrda maʼqullagan.