Ozarbayjon va Italiya strategik hamkorlik boʻyicha qoʻshma deklaratsiya imzoladi

Ozarbayjon va Italiya kritik xom ashyo sohasida strategik hamkorlik toʻgʻrisida qoʻshma deklaratsiya imzoladi. Hujjat Italiya sanoatchilari konfederatsiyasi (Confindustria) homiyligida oʻtkazilgan "Italiya-Ozarbayjon: iqtisodiy va sanoat hamkorligini mustahkamlash" tadbirining yakunida imzolandi.

Deklaratsiyani Ozarbayjon Iqtisodiyot vazirligi, Italiya Tashqi ishlar va xalqaro hamkorlik vazirligi hamda Italiya korxonalar va Made in Italy vazirligi imzoladi. Hujjat sanoat va texnologik rivojlanish, investitsiya, mintaqaviy taʼminot zanjirlari hamda logistikani qamrab olib, ikki davlat oʻrtasidagi sanoat hamkorligini kengaytirishga qaratilgan. Tadbirda Ozarbayjonning iqtisodiyot vaziri Mikayil Jabbarov va Italiya bosh vazir oʻrinbosari Antonio Tajani ishtirok etdi.

Ishtirokchilar, shuningdek, sunʼiy intellekt, maʼlumotlar markazlari hamda kritik xom ashyo, kon sanoati va metallurgiya sohalaridagi imkoniyatlarni muhokama qildi. Ular Alat erkin iqtisodiy zonasidagi rejalashtirilgan maʼlumotlar markazi loyihasi haqida maʼlumot oldi.