Tokayev: aholi jon boshiga YaIM 15 ming dollardan oshdi

Qozogʻiston Prezidenti Qosim-Javobir Tokayev Respublika kuni munosabati bilan oʻtkazilgan marosimda mamlakatning asosiy iqtisodiy va ijtimoiy yutuqlarini bayon qildi. Qazinform axborot agentligi Akordaga tayanib xabar bermoqda. Tokayev iqtisodiy oʻsish, uy-joy qurilishining kengayishi hamda kichik va oʻrta biznesning rivojlanishiga eʼtibor qaratdi.

Tokayevning soʻzlariga koʻra, 2019-yildan beri iqtisodiyot taxminan 30 foizga oʻsgan, aholi jon boshiga YaIM esa 15 ming dollardan oshgan. Milliy bolalar jamgʻarmasi dasturi doirasida yetti million bolaning hisobvaragʻiga 2,5 milliard dollar oʻtkazilgan. Oʻtgan yili 20 million kvadrat metrdan ortiq uy-joy foydalanishga topshirilgan, umr koʻrish davomiyligi esa 76 yilga yaqinlashgan. Jahon banki maʼlumotiga koʻra, Qozogʻiston bu koʻrsatkich boʻyicha mintaqada birinchi oʻrinda turadi.

Tokayev mamlakatning dunyoning eng nufuzli davlatlari qatoridagi oʻrni 34-oʻringa koʻtarilganini hamda YaIM 350 milliard dollarga yaqinlashganini, shu bilan birga MDH davlatlari orasida ikkinchi oʻringa chiqqanini taʼkidladi. Soʻnggi yetti yilda 155 milliard dollar investitsiya jalb qilingani hamda joriy yil boshidan buyon 60 milliard dollar qiymatiga ega 355 ta tijorat kelishuvi imzolangani maʼlum qilindi.