Oʻzbekistonda qurilish loyihalariga asossiz oʻzgartirish kiritish taqiqlanadi

Oʻzbekiston hukumati 2026-yil 21-oktabrdagi 584-son qarori bilan loyiha-qidiruv ishlari qiymatini aniqlash tartibi toʻgʻrisidagi nizomni tasdiqladi. Qarorga koʻra, maqsadli dasturlar doirasida byudjet mablagʻlari hisobidan moliyalashtiriladigan obyektlarda mualliflik nazorati xarajatlari shartnomada alohida koʻrsatiladi va loyiha-smeta hujjatlarini ishlab chiqish qiymatining 10 foizi miqdorida belgilanadi.

Loyiha tashkilotlariga bir marta 30 foiz miqdorida oldindan boʻnak toʻlanadi. Loyihalashtirish topshiriqlari raqamli formatda beriladi va elektron raqamli imzo bilan tasdiqlanadi. Tayyor hujjatlar «Shaffof qurilish» milliy axborot tizimi orqali qabul qilinib, bir ish kunida ekspertizaga yuboriladi. Raqamlashtirish maktab va maktabgacha taʼlim obyektlarida 2026-yil 1-dekabrgacha, soʻgʻliqni saqlash obyektlarida 2027-yil 1-sentabrgacha, boshqa obyektlarda 2028-yil 1-iyungacha bosqichma-bosqich amalga oshiriladi.

2027-yil 1-martdan byudjetdan moliyalashtiriladigan obyektlarning loyiha hujjatlariga yagona yondashuv joriy etiladi. Ijobiy ekspertiza xulosasi olinib, buyurtmachi tomonidan tasdiqlangandan keyin asossiz qoʻshimcha va oʻzgartirishlar kiritish taqiqlanadi. Tasdiqlangan obyekt qiymati loyiha tashkilotini tanlashda foydalanilgan dastlabki qiymatdan 1,5 baravardan ortiq oshsa yoki shuncha nisbatda kamaysa, loyiha-qidiruv ishlari qiymati qayta hisoblanadi. Qaror rasmiy eʼlon qilingan kundan uch oy oʻtgach kuchga kiradi.