Ziroat Mirziyoyeva rahbarligida ogʻir kasallikli bolalar uchun Global tarmoq tuzildi

AQSHdagi St. Jude bolalar ilmiy-tadqiqot shifoxonasi vitse-prezidenti, St. Jude Global direktori Karlos Rodriges-Galindo ogʻir va hayot uchun xavfli kasalliklarga chalingan bolalarni qoʻllab-quvvatlash boʻyicha Global tarmoq tuzilganini eʼlon qildi. Tarmoq Samarqandda oʻtkazilgan “Bolalar farovonligiga investitsiya” jahon sammiti doirasida taqdim etildi.

Oʻzbekiston birinchi xonimi, “Zamin” xalqaro jamoat fondi Vasiylik kengashi raisi Ziroat Mirziyoyeva tarmoqqa ikki yil muddatga rahbarlik qiladi. Tarmoq turli mamlakatlarning birinchi xonimlari va davlat rahbarlarining turmush oʻrtoqlarini bolalar salomatligi masalasida birlashtiradi; xalqaro hamkorlikni kengaytirish, tajriba va axborot almashish hamda amaliy tashabbuslarni ilgari surish koʻzda tutilgan.

Bu qaror Oʻzbekistonda bolalar onkologiyasi sohasida erishilgan natijalarning xalqaro eʼtirofi boʻldi. Manbaga koʻra, bu natijalar prezident Shavkat Mirziyoyev rahbarligida ixtisoslashtirilgan tibbiy yordam, zamonaviy diagnostika va davolash hamda bolalarni dori vositalari bilan taʼminlash boʻyicha amalga oshirilgan islohotlarga tayanadi. Tarmoqning navbatdagi yigʻilishi 2027-yil may oyida Jenevada yoki sentyabr oyida Nyu-Yorkda oʻtkazilishi rejalashtirilgan.