Qirgʻiziston va BMTning Jahon oziq-ovqat dasturi maktab ovqatlanishini muhokama qildi

Qirgʻiziston va BMTning Jahon oziq-ovqat dasturi oziq-ovqat xavfsizligi, maktab ovqatlanishi va ijtimoiy jihatdan himoyaga muhtoj fuqarolarni qoʻllab-quvvatlash sohasida hamkorlikni kengaytirishni muhokama qildi. Qirgʻiziston Tashqi ishlar vazirligining xabar berishicha, uchrashuv 23-oktabrda Tashqi ishlar vazirligining birinchi oʻrinbosari Aseen Isayev va Jahon oziq-ovqat dasturining vaqtincha ijrochi direktori Karl Skau oʻrtasida boʻlib oʻtgan.

Skau qirgʻiz tomonining ijtimoiy qoʻllab-quvvatlash va oziq-ovqat xavfsizligi boʻyicha birgalikdagi loyihalarni amalga oshirishdagi koʻmagi uchun minnatdorchilik bildirdi. Tomonlar, shuningdek, togʻli hududlarda tabiiy ofat xavfini kamaytirish hamda aholining tabiiy va iqlim tahdidlariga chidamliligini oshirishga alohida eʼtibor qaratdi. Muhokamada 2025–2030-yillarga moʻljallangan Oziq-ovqat xavfsizligi va ovqatlanish dasturi doirasida faoliyatni kengaytirish masalasi ham koʻrib chiqildi.

Isayev bu Jahon oziq-ovqat dasturi rahbariyatining Qirgʻizistonga birinchi tashrifi ekanini taʼkidladi va mamlakatining tashkilot bilan hamkorlikka tayyorligini tasdiqladi. U Skaudan 2027-yil oktabrida Bishkekda boʻlib oʻtadigan Ikkinchi global togʻ sammiti “Bishkek+25”da ishtirok etishni taklif qildi. Tomonlar Qirgʻizistonning 2027–2028-yillarda BMT Xavfsizlik Kengashidagi aʼzoligini ham hisobga olgan holda hamkorlikni davom ettirishga kelishib oldilar.