Oʻzbekistonning Samarqanddagi bolalar farovonligi sammiti Pokiston APPda

Pokistonning milliy axborot agentligi APP Samarqandda oʻtkazilgan “Bolalarga investitsiya: kelajak avlodlar uchun barqaror va adolatli rivojlanish sari” xalqaro sammiti natijalari haqida maqola eʼlon qildi. 21-22 oktyabrda boʻlib oʻtgan sammitni Oʻzbekiston hukumati BMTning ixtisoslashgan tashkilotlari va Jahon banki bilan hamkorlikda tashkil etgan. Unda dunyo davlatlarining birinchi xonimlari, vazirlar, xalqaro tashkilotlar vakillari va jamoatchilik ishtirok etdi.

Sammitda qabul qilingan Samarqand deklaratsiyasi bolalarni barcha zoʻravonlik va ekspluatatsiya shakllaridan himoya qilish, sifatli taʼlim va sogʻliqni saqlash xizmatlaridan foydalanishni kengaytirish hamda ularning farovonligiga investitsiyalarni oshirish maqsadlarini belgilab berdi. Maqolada Oʻzbekiston Milliy ijtimoiy himoya agentligi birinchi direktor oʻrinbosari Shahnoza Mirziyoyevaning nutqiga alohida eʼtibor qaratilgan. U bolalarning xavfsizligi, salomatligi va qadr-qimmatini taʼminlash ularning yorqin kelajagi uchun eng muhim shart ekanini taʼkidladi.

Maqolada, shuningdek, sammit doirasida Samarqandda “Imkon” koʻp profilli markazining ochilgani qayd etilgan. Maktabgacha taʼlim, maxsus pedagogik yordam va tibbiy-reabilitatsiya xizmatlarini birlashtirgan markazning maktabgacha boʻlimi 150 nafar bolaga, ambulator boʻlimi esa oyiga taxminan 100 nafar bolaga reabilitatsiya va maxsus pedagogik yordam koʻrsatishga moʻljallangan.