Turkmaniston: Serdar Berdimuhamedovning betaraflik haqidagi kitobi yapon tilida nashr etildi

Turkmanistonning Tashqi ishlar vazirligi qoshidagi Xalqaro munosabatlar institutida Prezident Serdar Berdimuhamedovning «Türkmenistanyň Bitaraplygy — parahatçylygyň we ynanyşmagyň aýdyň ýoly» (Turkmanistonning betarafligi — tinchlik va ishonchning ravshan yoʻli) nomli kitobining yapon tilidagi nashrining taqdimoti boʻlib oʻtdi. Manbaga koʻra, kitobning tarjimasi Turkmaniston va Yaponiya munosabatlarining yangi darajaga koʻtarilganining nishonasi sifatida baholandi.

Yaponiyaning Turkmanistondagi Favqulodda va Muxtor elchisi Hiroshi Sasaki nutq soʻzlab, tadbir ikki davlat oʻrtasidagi oʻzaro manfaatli munosabatlarning barcha yoʻnalishlarda rivojlanayotganini koʻrsatishini aytdi. Manbada qayd etilishicha, Turkmanistonning doimiy betaraflik maqomi BMT Bosh Assambleyasi tomonidan uch marta tan olingan. Kitobda turkman betarafligining tarixiy ildizlari, huquqiy maqomi va zamonaviy masalalardagi oʻrni yoritilgan.

Yangi nashr yuqori sifatli bosma usulida chop etilgan va sahifalarida turli tasviriy sanʼat asarlari joylashtirilgan. Ishtirokchilar xalqaro hamkorlikni kengaytirish yoʻlidagi saʼy-harakatlari uchun Prezidentga va Arkadagga minnatdorchilik bildirdilar.