Tokayev Qozogʻistonda rangli va nodir metallar boʻyicha shoshilinch topshiriq berdi

Qozogʻiston Prezidenti Qosim-Jomart Tokayev Qozogʻiston xalqiga murojaatida foydali qazilmalar boʻyicha topshiriqlar berdi. Nur.kz prezident maʼmuriyati Akordaga tayanib xabar bergan. Tokayevning aytishicha, geologik qidiruv yondashuvi tubdan qayta koʻrib chiqilishi kerak, chunki eski usullar bilan yangi konlarni izlash kerakli natija bermaydi.

Tokayev hukumatga kritik metallar boʻyicha milliy boshqaruv tizimini yaratishni topshirdi. Tizim kon loyihalarini uzoq muddatli moliyalashtirishni va mahalliy kompaniyalar bilan offtake shartnomalari orqali kafolatlangan talabni nazarda tutishi kerak. Takliflar tadbirkorlar bilan birgalikda ishlab chiqilib, yil oxirigacha taqdim etilishi soʻralgan.

Tokayev rangli va nodir metallar zaxirasini yaratish zarurligini ham taʼkidladi. U yangi korxonalar mavjud mahalliy kompaniyalar uchun asossiz toʻsiqlar yaratmasligi kerakligini aytdi. Shu doirada u Qarmet metallurgiya zavodini eslatib, uchta hududda shunga oʻxshash ishlab chiqarish rejalashtirilayotganini, biroq mahsulotga bozor talabi boʻlishi noaniqligini bildirdi.