Oʻzbekiston va Tailand vizasiz sayohat bitimini imzolashga kelishdi

Oʻzbekiston va Tailand ikki mamlakat oʻrtasida vizasiz sayohat toʻgʻrisidagi bitimni imzolashga kelishib oldi. Oʻzbekiston Tashqi ishlar vazirligi xabar berishicha, hujjat matni hozir Tailand tomonidan koʻrib chiqilmoqda. Kelishuvga ikki davlat tashqi ishlar vazirliklari oʻrtasidagi toʻgʻridan-toʻgʻri muzokaralar davomida erishilgan.

Vazirlikning qayd etishicha, may oyidan boshlab Oʻzbekiston fuqarolarining Tailand hududiga tashrif buyurishi uchun qulay sharoitlar yaratishga qaratilgan faol diplomatik saʼy-harakatlar amalga oshirilmoqda. Tailanddagi Bosh konsulxona Tailand Tashqi ishlar hamda Turizm va sport vazirliklari bilan muntazam uchrashuvlar oʻtkazib, elektron vizalarni rasmiylashtirishdagi muammolarni hal etish ustida ishlamoqda.

Sentabr oyida Tailand Oʻzbekiston fuqarolari ham kiradigan 93 ta davlat uchun 60 kunlik vizasiz rejimni bekor qildi. Oʻzbekiston fuqarolari turistik safar uchun oldindan viza rasmiylashtirishi kerak, viza yigʻimini toʻlash uchun esa Moskvadagi Tailand elchixonasiga murojaat qilish lozim.