Turkmaniston delegatsiyasi Buyuk Britaniyaning metan emissiyasini kamaytirish tajribasini oʻrgandi

Turkmanistonning neft-gaz sektori va tegishli vazirliklari vakillari metan emissiyasini oʻlchash, monitoring qilish hamda kamaytirish texnologiyalarini oʻrganish maqsadida Buyuk Britaniyaga tashrif buyurdi. Tanishuv safarini Buyuk Britaniyaning Turkmanistondagi elchixonasi va Xalqaro hamkorlik boʻyicha nemis jamiyati (GIZ) birgalikda tashkil etdi. Bu haqda chorshanba kuni Buyuk Britaniya elchixonasi xabar berdi.

Delegatsiya tarkibiga davlat konsernlari Turkmengaz va Turkmennebit hamda energetika, atrof-muhitni muhofaza qilish va tashqi ishlar vazirliklarining vakillari kirdi. Delegatsiya Londonda, Aberdinda, Piterhedda va Tisaydda Buyuk Britaniya hukumati ekspertlari, olimlar va soha mutaxassislari bilan uchrashib, amaliy yechimlarni joyida koʻrdi.

Delegatsiya metan siyosati, oʻlchov fani, sunʼiy yoʻldosh monitoringi, tashkil etilmagan emissiyalar hamda gazni alangada yoqish boshqaruvi boʻyicha britaniyalik tajribani oʻrgandi. Dasturga Buyuk Britaniyaning Energetik xavfsizlik va nol emissiya vazirligi (DESNZ), Royal Holloway issiqxona gazlari tadqiqot guruhi, Offshore Energies UK, GHGSat va BP kabi tashkilotlar kiritilgan.