Jizzaxda AESning ikkita yirik energoblokining qurilishi 2027-yilda boshlanishi mumkin

«Dunyo» axborot agentligi World Nuclear News portaliga tayanib, «Rosatom» maʼlumotlariga koʻra, Jizzaxdagi AES hududida VVER-1000 reaktorlarga ega ikkita yirik energoblok kichik modulli reaktorlar yonida joylashtirilishini xabar qildi. Hozir maydonda muhandislik-qidiruv ishlari olib borilmoqda va loyiha takomillashtirilmoqda.

AES maydonida ikkita kichik modulli reaktor qurilishi amalga oshirilmoqda. 2026-yil may oyida poydevorning birinchi beton plitasi quyilgan va bu bilan bogʻliq ishlarni yil oxirigacha yakunlash rejalashtirilgan. Kichik energoblokning biri uchun reaktor korpusi allaqachon tayyor. Birinchi kichik blokning ekspluatatsiya xodimlarini ishga qabul qilishni 2027-yil oxirida boshlash moʻljallangan. «Rosatom» rahbari Aleksey Lixachyov taʼkidlashicha, loyiha eksport modeli boʻyicha amalga oshirilayotgan dunyodagi yagona kichik atom elektr stansiyasi hisoblanadi.

Hozirda qurilish maydonida ming nafardan ortiq odam mehnat qilmoqda, yaqin oylarda xodimlar sonini kamida ikki barobarga oshirish rejalashtirilgan. Qurilishning katta qismini Oʻzbekiston kompaniyalariga topshirish koʻzda tutilmoqda. Stansiya yonida barpo etilishi rejalashtirilgan «yadro shaharchasi»ning birinchi bosqichi 33 ming aholiga moʻljallangan. Prezident Shavkat Mirziyoyevning «Rosatom» rahbari bilan uchrashuvida atom energetikasi uchun malakali kadrlar tayyorlash va uy-joy qurilishi sohasidagi hamkorlik masalalari ham muhokama qilingan.