TDT Anqara sammiti: Oʻzbekistonning strategik ustuvorliklari ilgari surildi

Turkiy davlatlar tashkiloti davlat rahbarlarining sammiti 29 oktyabrda Anqarada boshlandi. Ikki kun davom etadigan tadbir tashkilotning toʻlaqonli xalqaro tashkilotga aylantirilganiga besh yil toʻlishi munosabati bilan oʻtkazilmoqda.

Oʻzbekiston tashkilotga aʼzo boʻlganidan buyon amaliy hamkorlikni rivojlantirishga qaratilgan 85 dan ortiq tashabbusni ilgari surgan. Toshkent bu faollikni iqtisodiy manfaatlar, aʼzo mamlakatlarning geografik jihatdan oʻzaro bogʻliqligi va respublikaning koʻp yoʻnalishli tashqi siyosatining TDT tamoyillariga mosligi bilan izohlaydi. 2025-yil yakunlariga koʻra, TDT mamlakatlarining jami nominal yalpi ichki mahsuloti qariyb 2,3 trillion AQSh dollariga, umumiy tashqi savdo aylanmasi esa 1,2 trillion dollardan oshgan.

Oʻzbekistonning TDT aʼzo mamlakatlari bilan 2025-yildagi jami tovar aylanmasi 9 milliard 607 million dollarni tashkil etgan, bu respublika umumiy tashqi savdosining qariyb 12 foiziga teng. Ozarbayjon bilan Hojigabul shahrida qurilishi rejalashtirilgan avtomobil zavodi 2027-yil oʻrtalarida ishga tushirilishi kutilmoqda. Oʻzbekiston, shuningdek, ustav kapitali 500 million AQSh dollari boʻlgan Turkiy investitsiya jamgʻarmasining asosiy tashkilotchilaridan biri boʻldi. Oʻrta yoʻlak orqali yuk tashish hajmi soʻnggi besh yilda ikki baravar oshgan.