Oʻzbekiston va Turkiya savdo-iqtisodiy hamkorlikni kengaytirish boʻyicha hujjatlar imzoladi

Oʻzbekiston va Turkiya savdo-iqtisodiy hamkorlikni kengaytirish hamda uzoq muddatli sheriklikni mustahkamlashga qaratilgan bir qator ikki tomonlama hujjatlarni imzoladi. Hujjatlar Oʻzbekiston Prezidenti Shavkat Mirziyoyev va Turkiya Prezidenti Rajab Toyyip Erdoʻgʻan oʻrtasidagi Anqarada oʻtgan muzokaralar yakunlari boʻyicha rasmiylashtirildi.

Ikki davlat rahbarlari biznesni qoʻllab-quvvatlash boʻyicha Yuqori darajadagi kengash tuzish toʻgʻrisida kelishuvni imzoladi. Yangi tuzilma ikki mamlakat oʻrtasidagi biznes aloqalarini rivojlantirishga koʻmaklashishi koʻzda tutilgan. Shuningdek, imtiyozli savdo kelishuvi doirasida tovarlar roʻyxatini kengaytirish toʻgʻrisida protokol imzolandi.

Tomonlar, shuningdek, ijtimoiy taʼminot boʻyicha hukumatlararo kelishuv va uni amalga oshirish boʻyicha maʼmuriy kelishuvni imzoladi. Yana bir hujjat 2022-yil 29-martdagi protokolga oʻzgartirishlar kiritadigan qoʻshimcha protokol boʻlib, u tovarlar va transport vositalarining davlat chegaralari orqali harakatlanishi toʻgʻrisida axborotni oldindan almashishni tartibga soladi. Kelishuvlar savdo-iqtisodiy aloqalarni chuqurlashtirish, biznes uchun qulay sharoit yaratish hamda ikki mamlakat fuqarolarining ijtimoiy huquqlarini himoya qilishga qaratilgani qayd etildi.