Oʻzbekneftgaz qish oldidan benzin zaxirasini 2,5 barobar oshirdi

«Oʻzbekneftgaz» neft bazalaridagi benzin zaxirasini oʻtgan yilning shu davriga nisbatan 2,5 barobar oshirdi. Kompaniya oʻz tasarrufidagi yoqilgʻi quyish shoxobchalari kelgusi qish mavsumi uchun yoqilgʻi bilan taʼminlanganini bildirdi. Bu haqda kompaniya raisining qayta ishlash boʻyicha oʻrinbosari Abrorjon Xudoyberganov 27 oktyabr kuni boʻlib oʻtgan matbuot anjumanida maʼlum qildi.

Xudoyberganovning aytishicha, shoxobchalar tarmogʻi kengaymoqda. Yil boshida 31 ta boʻlgan shoxobchalar soni bugun 152 taga yetgan, mahsulot realizatsiyasi esa yil boshiga nisbatan 5–6 barobar oshgan. Shoxobchalarda AI-92 va AI-95 benzini hamda Yevro-4 va Yevro-6 standartlariga mos dizel yoqilgʻisi sotilmoqda. U soʻnggi 9–10 oy ichida avtobenzin narxi 12 mingdan unchalik oshmaganini aytdi.

Kompaniya matbuot kotibi Moʻmin Ibodov bu gap faqat «Oʻzbekneftgaz» tizimidagi shoxobchalar haqida ekanini, mamlakatdagi butun yoqilgʻi bozoriga taalluqli emasligini taʼkidladi. Kompaniya qish mavsumida navbatlar yoki benzin taʼminotida uzilishlar boʻlmasligiga kafolat bermadi.