Oʻzbekistonda quyosh energiyasi uchun 642,1 mlrd soʻm subsidiya toʻlandi

Oʻzbekistonda 2026-yilning yanvar–sentyabr oylarida 70,7 ming aholi quyosh panellari bilan ishlab chiqarilgan va elektr tarmoqlariga uzatilgan elektr energiyasi uchun Davlat byudjetidan 642,1 mlrd soʻm subsidiya oldi. Bu haqda “Fiskal tahlil” Telegram kanali xabar bergan.

Eng katta toʻlovlar Buxoro va Xorazm viloyatlariga hamda Qoraqalpogʻiston Respublikasiga amalga oshirilgan. Buxoro viloyati aholisiga 116,7 mlrd soʻm, Xorazm viloyati aholisiga 115,3 mlrd soʻm, Qoraqalpogʻistonga esa 77,2 mlrd soʻm oʻtkazilgan.

Subsidiyani Soliq mobil ilovasi orqali olish mumkin. Buning uchun “Keshbek va imtiyozlar” xizmatiga kirib, “Quyosh uyi” boʻlimini tanlash, soʻng “Kartaga oʻtkazish” funksiyasidan foydalanish kerak.