Qozogʻiston va Xitoy 200 mln dollargacha qoʻshma investitsiya fondi tayyorlamoqda

Qozogʻiston va Xitoy dastlabki hajmi 200 mln dollargacha boʻlgan va keyinchalik oshirilishi mumkin boʻlgan qoʻshma toʻgʻridan-toʻgʻri investitsiya fondi yaratish ustida ishlamoqda. Qozogʻiston hukumatining matbuot xizmati Markaziy Osiyoda iqtisodiy hamkorlik boʻyicha Ikkinchi Tyan-Shan forumi doirasida Bosh vazir oʻrinbosari va Milliy iqtisodiyot vaziri Serik Jumangarin bilan Xitoy moliya vaziri Lan Foʻan oʻrtasidagi uchrashuv yakunlari haqida xabar berdi.

Uchrashuvda Trans-Kaspiy xalqaro transport yoʻlagini rivojlantirish uchun qoʻshma investitsiya fondi masalasi muhokama qilindi. Tashabbus Qozogʻiston tomonidan iyulda Shanxayda boʻlib oʻtgan yetakchilar uchrashuvida ilgari surilgan. Jumangarin fond ishga tushirilishini tezlashtirish uchun ikki mamlakatning masʼul moliya institutlarini belgilashni taklif qildi.

U, shuningdek, yangi tashkilot tuzmasdan, mavjud mexanizmlarni yagona qozogʻiston-xitoy loyiha moliyalashtirish va sugʻurta «oynasi» orqali birlashtirishni taklif qildi. Bu uzoq muddatli kreditlash, sugʻurta, kafolatlar, yuanda moliyalashtirish va zarur hollarda ulush ishtirokini oʻz ichiga olgan kompleks paketlar shakllantirishga imkon beradi. Tomonlar Xitoy Eksport-Import banki bilan hamkorlikni kengaytirish masalasini ham koʻrib chiqdi.