Japarov: Gazprom mamlakatni gazlashtirmasa, Kumtor kabi olib, oʻzim qilaman

Qirgʻiziston prezidenti Sadir Japarov 3-noyabrda Talas viloyatining Aytmatov va Manas tumanlari aholisi bilan uchrashuvda, agar “Gazprom” mamlakatni gazlashtirmasa, gaz tizimini Kumtor kabi olib, oʻzi qilishini bildirdi.

Semetey qishlogʻi aholisi Kurmanbek Takeyev chegaraboʻyi Manas tumanini gazlashtirishni soʻradi. Japarov Qirgʻiziston gaz tizimining egasi emasligini va uni boshqara olmasligini aytdi. Uning soʻzlariga koʻra, egasi “Gazprom”, tizim esa 2039-yilgacha 1 dollarga sotilgan. U 2013-yilda “Bizga Qirgʻizgaz kerak emas, gaz kerak” deyilib sotilganini eslatdi.

Prezidentning aytishicha, Qirgʻiziston hududidagi gaz masalalarini hozircha faqat “Gazprom” bilan hal qilish mumkin. Shartnomada butun mamlakatni gazlashtirish uchun mablagʻ ajratish bandlari bor, ammo ular hali bajarilmagan. Japarov ikki-uch yildan beri bu masalani koʻtarib kelayotganini va “Agar qilmasangiz, Kumtor kabi olib, oʻzim qilaman. Lekin gaz bizga oʻtmaguncha, buni vaʼda qila olmayman” deganini taʼkidladi.