Buxoro neftni qayta ishlash zavodi 328 mln dollarga modernizatsiya qilinadi

Oʻzbekistonda Buxoro neftni qayta ishlash zavodi 328 mln dollarlik modernizatsiya loyihasi asosida yangilanadi. Loyiha Davlat rahbariga taqdim etilgan. Kun.uz xabar berishicha, zavodda joriy yilning toʻqqiz oyida 1,36 mln tonna, qiymati 12,1 trln soʻm boʻlgan neft mahsulotlari ishlab chiqarilgan. Mahsulot va xizmatlar eksporti 99,5 mln dollarni tashkil etgan. Yil yakunigacha bu koʻrsatkichni 116 mln dollarga yetkazish rejalashtirilgan.

Loyiha xomashyoni qayta ishlash hajmini oshirish bilan birga yuqori oktanli benzin ishlab chiqarish imkoniyatlarini kengaytirishga qaratilgan. Doirasida naftani gidrotozalash va izomerizatsiya qurilmalari oʻrnatiladi. Gidrotozalashda xomashyo tarkibidagi oltingugurt va boshqa aralashmalar kamaytiriladi, izomerizatsiya esa yengil fraksiyalardan olinadigan benzinning oktan sonini oshiradi. Bu jarayonlar Yevro-5 talablariga javob beradigan AI-92 va AI-95 benzin ishlab chiqarish uchun muhim hisoblanadi.

Loyihada xomashyoni fraksiyalarga ajratish va ogʻir qoldiqlarni chuqur qayta ishlash ham nazarda tutilgan. Natijada zavodning yillik qayta ishlash quvvatiga 2,5 mln tonna qoʻshilib, umumiy quvvat 5 mln tonnaga yetadi. Prezident modernizatsiya ishlarini belgilangan muddatlarda va yuqori sifatda bajarish boʻyicha koʻrsatmalar berdi hamda loyihada ishtirok etayotgan xorijiy kompaniyalar vakillari bilan muloqot qildi.