Turkmaniston va AQSh Ashxobodda siyosiy maslahatlashuvlar oʻtkazdi

Turkmaniston va Amerika Qoʻshma Shtatlari oʻrtasidagi navbatdagi siyosiy maslahatlashuvlar 2026-yil 3-noyabrda Ashxobodda, Turkmaniston Tashqi ishlar vazirligi binosida boʻlib oʻtdi. Turkmaniston delegatsiyasiga Tashqi ishlar vaziri Rashid Meredov rahbarlik qildi. AQSh delegatsiyasiga esa AQSh Davlat departamentining Janubiy va Markaziy Osiyo masalalari boʻyicha yordamchi davlat kotibi Samir Pol Kapur boshchilik qildi. Bu haqda Turkmaniston Tashqi ishlar vazirligi xabar berdi.

Maslahatlashuvlarda tomonlar ikki tomonlama munosabatlarning joriy holati va rivojlanish istiqbollarini muhokama qildi. Muntazam siyosiy muloqotning ahamiyati taʼkidlandi. Siyosiy-diplomatik, savdo-iqtisodiy, energetika, transport, taʼlim, madaniy va insonparvarlik sohalaridagi hamkorlikka alohida eʼtibor qaratildi. Savdo aloqalarini kengaytirish va investitsiyalarni jalb qilish masalalari ham koʻrib chiqildi.

Shuningdek, taʼlim, fan hamda madaniy-insonparvarlik almashinuvlarini rivojlantirish, mintaqaviy va xalqaro kun tartibi masalalari muhokama qilindi. Tomonlar “Markaziy Osiyo – AQSh” (C5+1) formatidagi hamkorlikni ham koʻrib chiqdi. Yakunda ikki tomon Turkmaniston-Amerika hamkorligini chuqurlashtirishga intilishini tasdiqladi.