Oʻzbekistonning JSTga aʼzolik jarayoni: erishilgan natijalar va oldidagi vazifalar

Toshkentda Oʻzbekistonning Jahon savdo tashkilotiga (JST) aʼzolik jarayonining joriy holati va ustuvor vazifalariga bagʻishlangan matbuot konferensiyasi boʻlib oʻtdi.

Unda Oʻzbekistonning JSTga aʼzolik boʻyicha Ishchi guruhi raisi Sung-Yo Choi, JST Kotibiyatining yangi davlatlarning qoʻshilishi departamenti direktori Mika Oshikava hamda davlat idoralari vakillari ishtirok etdi. Tadbirda mamlakatning tashkilotga qoʻshilishi doirasida amalga oshirilayotgan iqtisodiy islohotlar, muzokaralarda erishilgan natijalar va kelgusi vazifalar haqida batafsil maʼlumot berildi.

Joriy yilda Ishchi guruhining 12- va 13-majlislari oʻtkazilgani taʼkidlandi. Ushbu tadbirlar doirasida aʼzo davlatlar tomonidan berilgan 400 dan ortiq savolga javob berildi va 30 dan ortiq tegishli hujjat taqdim etildi. Shuningdek, tovar va xizmatlar bozorlariga kirish boʻyicha ikki tomonlama muzokaralarda sezilarli natijalarga erishildi. Tadbirda JSTga aʼzolik tashqi savdo imkoniyatlarini kengaytirishi, investitsiya muhitini yaxshilashi va milliy iqtisodiyot raqobatbardoshligini oshirishi taʼkidlandi.