Cənubi Kipr: DİSİ sədri Annita Demetriu Afinada Kiriakos Mitsotakis ilə görüşüb

DİSİ-nin sədri Annita Demetriu dünən Afinada Yunanıstan Baş naziri Kiriakos Mitsotakis ilə görüşüb.

Fileleftheros qəzetinin xəbərinə görə, görüşdə Kipr problemi, Cənubi Kipr ilə Yunanıstan arasında elektrik bağlantısı nəzərdə tutan “Great Sea Interconnector” (GSI) layihəsi, regional əməkdaşlıq, müdafiə və təhlükəsizlik məsələləri müzakirə olunub. Demetriu jurnalistlərə açıqlamasında Şərqi Aralıqdənizdəki gərginliklərlə mübarizə və milli maraqların qorunması üçün Cənubi Kipr ilə Yunanıstanın birgə hərəkət etməsinin vacibliyinə toxunub.

Demetriu, Türkiyənin “barışmaz mövqeyinə” qarşı mövcud bütün Avropa vasitələrindən istifadə edilməsi lazım olduğunu iddia edib. GSI layihəsinin Cənubi Kiprin enerji təcridinə son qoyacağını və Avropanın enerji təhlükəsizliyi baxımından strateji əhəmiyyət daşıdığını bildirib. Görüşdə Türkiyə ilə Liviya arasında imzalanan memorandum da müzakirə olunub. Demetriunun memorandumun “qeyri-qanuni” kimi qiymətləndirilməsi üçün bütün platformalarda səylərin gücləndirilməsi barədə razılığa gəldiyi bildirilib.