Azərbaycan: Yanacaq ixracı Ermənistanda qiymətləri 20–30% azaldıb

Azərbaycanın Birləşmiş Krallıqdakı səfiri Elin Süleymanov The Telegraph qəzetində dərc olunmuş məqaləsində Azərbaycan və Ermənistan arasında sülh müqaviləsinə aparan yolda bir sıra çətinliklərin qaldığını bildirib. Bakının Ermənistan Konstitusiyasından Azərbaycana qarşı ərazi iddialarına dair istinadların rəsmi və daimi şəkildə çıxarılmasına xüsusi əhəmiyyət verdiyini deyən Süleymanov, Baş nazir Nikol Paşinyanın konstitusiya islahatlarına açıq dəstəyini önəmli addım kimi qiymətləndirib. O, beynəlxalq ictimaiyyətin sözlərin konkret fəaliyyətə çevrilməsini xatırlatmalı olduğunu vurğulayıb.

Süleymanov bildirib ki, bir il əvvəl Ermənistana tranzit məhdudiyyətləri götürülüb, iki ay sonra isə Azərbaycan Ermənistana ilk yerli istehsal benzin göndərişini həyata keçirib. Bu ilin ortalarına qədər Azərbaycandan qonşuya on minlərlə ton yanacaq məhsulu ixrac edilib.

O, yaranmış regional təchizat zəncirinin Ermənistanda daxili yanacaq qiymətlərinin 20–30% azalmasına töhfə verdiyini deyib.