Şimali Kiprdə 6 dekabr seçkilərinə boykot çağırışı

Birləşmiş Kipr Partiyası (BKP), Yeni Kipr Partiyası (YKP) və Arif Hasan Tahsin Vəqfinin iştirak etdiyi Kiprli Sülh və Həmrəylik Hərəkatı, 6 dekabrda keçiriləcək seçkilərin “Kipr türklərinin iradəsini əks etdirməyəcəyi” əsasında boykot edilməsinə çağırış edib. Qərar BKP-nin mərkəzi binasında keçirilən mətbuat konfransında elan olunub.

Arif Hasan Tahsin Vəqfinin Müvəlli Heyətinin sədri Şener Elcilin oxuduğu birgə bəyanatda 1949-cu il Cenevrə Konvensiyasına zidd olaraq adaya əhalinin köçürüldüyü, yüz mindən çox adama vətəndaşlıq verildiyi və Kipr türk icmasının azlığa çevrildiyi bildirilib. Bəyanatda, 2024-cü il iyun Avropa Parlamenti seçkilərində səsvermə hüququ olan Kipr Respublikası vətəndaşı kipr türklərinin sayının 103 min, Şimali Kipr Türk Respublikasında seçicilərin sayının isə təxminən 225 min olduğu qeyd edilib.

BKP-nin sədri İzzet İzcan seçkilərin artıq Kipr türk icmasının iradəsini əks etdirmədiyini deyib. YKP-nin Baş katibi Murat Kanatlı isə seçki prosesinin Türkiyədən göstərişlərlə idarə olunduğunu iddia edərək, prosesi qanuniləşdirməmək üçün namizəd göstərməmək qərarı verdiklərini bildirib.