Azərbaycanda sosial müavinət və təqaüd alanların sayı artır

Azərbaycanda aylıq sosial müavinət və təqaüd alanların sayı artır. 2026-cı ilin sentyabrında onların sayı ötən ilin eyni dövrü ilə müqayisədə təxminən 3 faiz artaraq 885,9 min nəfəri ötüb. Bu ilin ilk doqquz ayında müavinət və Prezident təqaüdləri üzrə ödənişlər də artıb.

Hüquq elmləri doktoru, iqtisadçı Vüsalə Əhmədova Globalinfo.az-a verdiyi müsahibədə dövlətin sosial ödəniş öhdəliklərinin yalnız mövcud benefisiarlar üzrə deyil, yeni hüquq qazanan şəxslər hesabına da genişləndiyini bildirib. DSMF-nin 2026-cı ilin yanvar-sentyabr ayları üzrə məlumatlarına görə, müavinət və təqaüdlər üzrə ümumi ödənişlər 1,692 milyard manat təşkil edib: 951 milyon manat sosial müavinətlər, 609 milyon manat Prezident təqaüdləri, 132 milyon manat sosial sığorta müavinətləri.

İqtisadçı xərclərin yüksəlməsini yalnız yeni şəxslərin daxil olması ilə izah etmənin doğru olmadığını, ödənişlərin orta məbləğinin və strukturunun da nəzərə alınmalı olduğunu vurğulayıb. Dövlət büdcəsinin və DSMF gəlirlərinin proqnozlaşdırılması və sosial öhdəliklərin uzunmüddətli planlaşdırılması daha vacib olur.