Yaşar Güler: Türkiyə Azərbaycan və digər tərəfdaşlarla hərbi əməkdaşlığı genişləndirir

Türkiyə Milli Müdafiə naziri Yaşar Güler, Məkkə və Bədr razılaşmalarının Türkiyənin beynəlxalq təhlükəsizlik sistemindəki fəal rolunu nümayiş etdirdiyini bildirib. O, Azərbaycan və digər dost ölkələrlə əməkdaşlığın regional təhlükəsizliyə töhfə verdiyini vurğulayıb.

Haber Global-a istinadən Report.az-ın məlumatına görə, Güler dəyişən geosiyasi şərait fonunda təhlükəsizliyini, milli maraqlarını və beynəlxalq sülhə töhfəsini qorumaq üçün çəkindirmə qabiliyyətinə malik, müasir və güclü silahlı qüvvələrə sahib olmağın vacibliyini vurğulayıb. Nazir Türkiyənin xüsusilə Şimali Kipr, eləcə də Azərbaycan və digər qardaş ölkələrlə hərbi əməkdaşlığı inkişaf etdirdiyini deyib.

Güler, Türkiyə, Səudiyyə Ərəbistanı və Pakistanın imzaladığı Məkkə Razılaşmasının ortaq müdafiə, çəkindirmə və hərbi koordinasiyaya əsaslanan genişlənmiş təhlükəsizlik əməkdaşlığını nəzərdə tutduğunu bildirib. Keçən həftə Türkiyə, Qətər, Pakistan və İndoneziyanın imzaladığı Bədr Anlaşma Memorandumunun isə müdafiə sənayesi əməkdaşlığını, texniki hərbi təlimi, bilik və təcrübə mübadiləsini, birgə istehsalı, texnologiya inkişafını və Ar-Ge-ni gücləndirməyi hədəflədiyini qeyd edib.