Қырғызстан Ресейге Элистан Тоқтоғұлов туралы нота жіберді

Қырғызстан Сыртқы істер министрлігінің хабарлауынша, Ресейдегі Қырғызстан елшілігі Элистан Тоқтоғұлов туралы Ресей Сыртқы істер министрлігіне нота жіберген. Министрлік мәліметінше, 21 жастағы азамат белгісіз тұлғалардың алаяқтық әрекеттері салдарынан Ресейдегі әскери бөлімнің бірінде жүр. Нотада азаматты мүмкіндігінше тез Отанына қайтару талап етілген.

Елшілік сондай-ақ Ресейдің құзыретті органдарына ресми хаттар жолдап, оқиғаны жан-жақты тексеруді, кінәлілерді анықтап, заңға сәйкес жауапқа тартуды сұраған. Елшілік азаматтың жақын туыстарымен тұрақты байланыста екенін және мәселе ерекше бақылауда тұрғанын мәлімдеді.

Манас қаласында 4 қарашада азаматтың туыстары оны Украинадағы соғысқа баруға мәжбүрлеп жатқанын айтып, билікке жүгінді. Бауыры Баястан Құштарбек уулу Элистанның Instagram-нан жұмыс хабарландыруын тапқанын, оған жүк көлігінің жүргізушісі, қауіпсіздік қызметкері және автомеханик лауазымдары ұсынылып, 105–110 мың рубль жалақы уәде етілгенін айтты. Министрлік азаматтарды келісімдерге қол қоймас бұрын мұқият оқуға шақырды.