Қасым-Жомарт Тоқаев Иордания Королі Абдалла II-мен келіссөз жүргізді

Мемлекет басшысы Қасым-Жомарт Тоқаев ресми сапармен Қазақстанға келген Иордания Королі ІІ Абдалла бен әл-Хусейнмен келіссөз жүргізді. Тоқаев Королді әуежайда қарсы алды. Ақорданың баспасөз қызметіне сілтеме жасаған Egemen Qazaqstan хабарлағандай, келіссөзде екі ел арасындағы берік достық, өзара құрмет пен ынтымақтастық атап өтілді.

Тоқаев Иорданияны араб әлеміндегі сенімді серіктес деп атады. Кейінгі жылдары ықпалдастық қарқын алып келеді: былтыр екі жетекші бір-біріне сапармен барды, бірлескен мәлімдеме қабылданды, министрліктер, ведомстволар және іскерлік орта өкілдері арасында көптеген құжатқа қол қойылды. Экономикалық ықпалдастық екіжақты қарым-қатынастың негізгі қозғаушы күші болып қала беретіні, академиялық, ғылыми байланыстар мен туризмнің де әлеуеті зор екені айтылды.

Тоқаев Корольдің бастамасымен басталған Ақаба процесіне тоқталып, Қазақстанның Орталық Азияда алғаш рет осындай форматтағы кездесуді ұйымдастырушылардың бірі ретінде қатысатынын атап өтті. Сессия жасанды интеллект саласындағы қауіпсіздік мәселесіне арналған. Король қарсы алғаны үшін Тоқаевқа алғыс айтып, сауда, инвестиция, туризм, технология және қорғаныс салаларында ынтымақтастықты кеңейтуге ниетті екенін жеткізді. Сондай-ақ аймақтық қауіпсіздік пен терроризм мен экстремизмге қарсы күрес ісінде Қазақстанмен ықпалдастықты арттыруға мүдделі екенін растады.