Қанат Бозымбаев Алматыдағы азаматтық қорғау нысандарының жер сілкінісіне дайындығын тексерді

Премьер-министрдің орынбасары Қанат Бозымбаев Алматыға жұмыс сапары барысында азаматтық қорғау нысандарын аралап, сейсмологиялық мониторинг және халықты құлақтандыру жүйелерінің жұмысымен танысты. Нысандарды аралау қорытындысы бойынша Алматы қаласының әкімдігінде сейсмикалық қауіпсіздік мәселелері жөнінде кеңес өткізді. Оған қала әкімі Дархан Сатыбалды мен салалық министрліктер өкілдері қатысты.

Кеңесте Қазақстан аумағының шамамен 40%-ы сейсмикалық қауіпті аймақтарға жататыны атап өтілді. Жыл басынан бері 1 мыңнан астам жер сілкінісі тіркелген, оның сегізі 2-4 балл деңгейінде сезілген. Қанат Бозымбаев сейсмикалық қауіпті болжауда заманауи тәсілдер қажет екенін және бұл жұмысқа цифрлық құралдарды белсенді енгізу керектігін айтты.

Вице-премьер ғимараттардың сейсмикалық төзімділігіне бақылауды күшейтуді, қауіпті өңірлердегі нысандарды тексеруді және қауіп-қатерлердің цифрлық дерекқорын қалыптастыруды тапсырды. Тектоникалық жарылымдар аймақтары мен тау бөктерінде құрылыс салуға тыйым салу қажеттігі атап өтілді. ТЖМ-ге «Mass Alert» жүйесін енгізуді аяқтау және халықтың жер сілкінісіне дайындығын күшейту тапсырылды.