Қырғызстанда Ақ-Тала ауданында 68 отбасына баспана берген әлеуметтік қалашық ашылды

Қырғызстанның Нарын облысы Ақ-Тала ауданындағы Қайыңды-Бұлақ ауылында жаңа әлеуметтік қалашық салынып, 68 отбасы баспанамен қамтамасыз етілді. Turmush басылымының тілшісі хабарлағандай, қалашық 1,5 гектар жер учаскесінде қайырымдылық қорларының бірінің қаржысы есебінен салынған. Оның құны 67 млн 338 мың сомды құрайды.

Ашылу салтанаты 16 қазанда өтті. Оған тиісті билік органдарының өкілдері мен жергілікті тұрғындар қатысты.

Қалашықта барлығы 76 тұрғын үй салынған: 4-і медицина қызметкерлеріне, 4-і муниципалды қызметкерлерге, 68-і әлеуметтік көмекке мұқтаж отбасыларға берілген. Сондай-ақ мұнда 1 фельдшерлік-акушерлік пункт, 1 медресе және 1 дүкен бар. Тұрғын үйлерден бөлек, қалашықта тігін цехы, футбол алаңы және су құбыры көзделген.