Астанада бірнеше жол ашылады: әкім мерзімін атады

Астана әкімі Жеңіс Қасымбек елордада жыл аяғына дейін тағы 15 шақырым жол салынып, көлік қозғалысына ашылатынын айтты. Бұл туралы Tengri Auto Астана әкімдігінің сайтына сілтеме жасап хабарлады.

Тәуелсіздік көшесінің Қабанбай батыр даңғылынан Хусейн бен Талал көшесіне дейінгі бөлігінде құрылыс жұмыстары жүріп жатыр. Жобаға жаңбыр суы және тұрмыстық кәріз жүйелері, кабель арналары, жылу және байланыс желілері кіреді, кәріз сорғы станциясы салынып жатыр. Жол төсемін төсеу жұмыстары қарқынды жүргізілуде. Әкім қарашаның аяғына дейін учаскенің бір жағымен көлік қозғалысын ашу жоспарланғанын айтты.

Жангелдин көшесінің құрылысы аяқталғаннан кейін Қ. Күмісбеков пен Ш. Бейсекова көшелерінің арасында көлік қатынасы ашылады. Н. Тілендиев даңғылы мен Ш. Бейсекова көшесінің қиылысында салынып жатқан екі деңгейлі жолайрықтың металл конструкциясын құрастыру толық аяқталды, инженерлік коммуникацияларды тарту жұмысының 90%-ы орындалды. Жоба қамтитын жолдың бүкіл бойымен көлік қозғалысын 10 қарашаға дейін ашу жоспарланған. Әкімнің мәліметінше, биыл Астанада 50-ге жуық жол нысаны жұмыспен қамтылған.